Изображения: Выкл Вкл Шрифт: A A A Цвет: A A A A Обычная версия
Вернуться к обычному виду

Иворъёс

Гурт фермеръёслы 2020-ти арысен чакламын юрттэт 25.11.2019

Гурт фермеръёслы 2020-ти арысен чакламын юрттэт

Вуоно арысен пичиесь предприятиослы но фермеръёслы бадзымгес саклык висъяськоз. Та пумысен Гурт удысъя но сиён-юонъя министерстволэн Общественной советэз кенешиз.

2020-ти арысен Москва воксе выль сямен радъялоз гурт предприятиослы юрттэт сётонэз. Вань субсидиос табере 2 пумо луозы: хозяйствоез нуыны быдтэм коньдонэз бэрыктон (компенсационная выплата) но хозяйствоез азинтыны уксё сётон (стимулирующая выплата). Федерал бюджетысь шаерамы талы оглом 2 миллиард 108 миллион манет вуоз, Удмурт Элькунлэн казнаысьтыз висъяськоз ог 980 миллион манет.

Татчыозь гурт предприятиослы котькуд кизем гектар музъем понна субсидия сётыськылиз. Табере сыӵе юрттэт уз луы ни. Со интые бусы ужъёсты быдэстэм понна компенсация тырозы. Но со юрттэтэз басьтыны быгатозы сыӵе предприятиос гинэ, кытын ужасьёссы 100 адямилэсь ичи, нош ортчем ар понна выручказы 800 миллион манетозь вуиз.

- Шаерысьтымы хозяйствоослэсь югдурзэс эскеримы, - кенеше люкаськемъёслы вазиськиз гурт удысъя но сиён-юонъя министр Ольга Абрамова. – Жаляса пусъёно, бадӟым предприятиос та юрттэтэз басьтыны уз быгатэ, малы ке шуоно ужасьёссы трос. Но та ӟеч юрттэт луоз бакча сиён, картошка, етӥн но технической кенэм будэтӥсь фермеръёслы но пичи хозяйствоослы. Тазьы тыршемзы понна ке но коньдон басьтыны быгатозы, соос пӧлысь угось тросэз йӧл поттонэн уг выро.

Кенеше люкаськем хозяйствоослэн кивалтӥсьёссылэсь та ужпум мылкыдзэс бугыртӥз. Соос но музъемез утялтыны-гырыны но кизьыны уксёзэс кисьтоно луо ук. Та понна киязы вуэм субсидия удобрение я топливо басьтыны ке но юрттэт луэ вал ай. Воштӥськонэн валче куд-ог бадӟым хозяйствоос пичи предприятиослы уз-а люкись-ке? Зэм, бадӟым предприятиос мукет юрттэт басьтыны быгато: йӧл понна но, ӟеч выжыысь пудо вордэм понна но. Йӧл кыскем понна субсидиез люкылонын но воштӥськонъёс кылдозы. Сётӥськоз со котькуд скаллэсь ар ӵоже 5 сюрс килограммлэсь трос йӧл кыскисьёслы, котькуд килограмм йӧлзэс санэ басьтыса. Татын но пичи предприятиослы но фермеръёслы тросгес субсидия тырыны чакламын, соос ӝутӥськыны мед быгатозы шуыса.
Нялтас вераса, туэ чакламын вал 6 выль фермер кылдоз шуыса, нош 1-тӥ ноябрьлы регистрация пыр ортчиз ни 38-эз. Юрттэт будэ бере, вуоно арын эшшо 36 фермер кылдоз шуыса чакламын.

Стимул музэн грантлы субсидия сётӥськоз кутскись фермеръёслы но семьяен ужась фермеръёслы. Грант люкылозы на техниказэс выльдыны малпасьёслы. Озьы ик та юрттэтэз басьтыны быгатозы производствозэс ӝутон вылысь кредитлы вазиськем пичи предприятиос.
Ольга Абрамова пусъемъя, гурт удысын сиён-юон поттыны чакламын ог 67 миллиард 568 миллион манет тыр. Туэ 1-тӥ октябрьлы та лыдпус ог 55 миллиард манет вал.

Автор: Елена Сараматова
Источник: https://udmdunne.ru/2019/11/№87-21-11-2019/

Возврат к списку